काठमाडौं । प्रधानमन्त्री शेरबहादुर देउवाले अमेरिकी सहयोग परियोजना मिलेनियम च्यालेन्ज कर्पोरेशन (एमसीसी) प्रस्ताव पास गर्न भनी नेकपा एमालेका अध्यक्ष केपी शर्मा ओलीसँग प्रस्ताव गरेका छन् ।

शनिवार भक्तपुरको बालकोटस्थित ओली निवास पुगेर देउवाले संसदको गतिरोध हटाएर एमसीसी पास गर्न प्रस्ताव गरेका थिए । सरकारबाट बाहिरिएपछि एमसीसीबारे सरकार नै मौन रहेकाले त्यसबारे आफू नबोल्ने ओलीले अडान लिँदै आएका थिए ।

पछिल्लो समय भने देउवाले एमसीसी पास गर्नुपर्ने भन्दै गठबन्धन दलहरुसँग पनि छलफल अघि बढाएका थिए ।

शनिवार देउवाले गरेको प्रस्तावमा पनि ओलीले मौनता साँधेका छन् । आफूहरुको माग अहिलेसम्म पनि सम्बोधन नभएको भन्दै संसदको अवरोध कायमै रहने ओलीले जवाफ फर्काए । उनले एमसीसीबारेका देउवाको प्रस्तावमा कुनै जवाफ नदिएर माैनता साँधेका छन् ।

एमसीसीबारे सत्ता पक्षले नै औपचारिक रुपमा केही नभनेको ओलीको भनाइ थियो ।

बिहीबार मात्र बसेको पाँचदलीय समन्वय समितिले संघीय संसदको अवरोध हटाउन विपक्षी दलको नेतासँग सम्वाद गर्न प्रधानमन्त्रीलाई आग्रह गरेको थियो । त्यसको दुई दिनपछि शनिबार प्रधानमन्त्री देउवा, विपक्षी दल नेकपा एमालेका अध्यक्ष ओलीलाई भेट्न उनकै निवास बालकोट पुगेका थिए ।

प्रधानमन्त्री शेरवहादुर देउवा प्रमुख प्रतिपक्षी दल नेकपा एमालेका अध्यक्ष केपी ओली भेटन ओलीको भक्तपुर बालकोटस्थित निवासमा विहान १० वजेर १० मिनेटमै पुगेका थिए । अघिल्लो दिन नै सत्ता गठवन्धन दलले निर्माण गरेको उच्चस्तरीय राजनीतिक संन्यत्रले प्रधानमन्त्री देउवालाई ओलीसँग निर्णायक सम्वादका लागि छलफल गर्ने अख्तियार दिएको थियो ।