कैलाली । कैलाली–कञ्चनपुरलगायत तराईका जिल्लाहरूमा एक सातादेखि चिसो ह्वात्तै बढेको छ । बिहान बाक्लो हुस्सुसँगै दिनभरि कुहिरो लाग्न थालेको छ । दिनभरि घाम नलागेपछि बढ्दो चिसोका कारण जनजीवन प्रभावित बनेको छ ।

चिसो बिहान स्थानीयवासी घरबाहिर निस्कन सकेका छैनन् ।बजारमा चलहपहल कम भएको छ । वृद्धवृद्धा तथा बालबालिका सडकमा देखिँदैनन् । चिसोकै कारण बिरामीसमेत बढेका छन् ।

चिसोसँगै दम, निमोनिया, रुघाखोकी, ज्वरोलगायत रोगका बिरामी बढेका हुन् । एकाएक बढेको चिसोसँगै बिरामीको संख्या ह्वात्तै बढेको सेती प्रादेशीक अस्पताल धनगढीका सूचना अधिकारी दिलीपकुमार श्रेष्ठले बताए । बालबालिका, वृद्धवृद्धा, मुटु, मिर्गौला, मधुमेह तथा अन्य दीर्घरोगी चिसोले थप जोखिममा भएकाले यो मौसममा उनीहरूले विशेष ख्याल पु¥याउनुपर्ने चिकित्सकको सुझाव छ ।
चिसोका कारण बढी मारमा मजुदरहरु परेका छन् ।

दिनभर चिसोमा काम गर्दा स्वास्थ्यमा समस्या देखिएको धनगढी १ हरियाली टोलका मोहन चौधरीले बताए ।‘दिनभर जाडोमा काम गर्नुपर्छ,’ उनले भने, ‘साँझ आएर आगो तापम भनेपनि दाउरा छैन् के गर्नु । गत वर्ष त धनगढी उपमहानगरपालिकाले दाउरा वितरण गरेको भएपनि यसवर्ष भने गरेन ।’
चिसोले घरबाहिर निस्केर हिँडडुल गर्न पनि गाह्रो भएको धनगढी १ कै कमला चौधरीले बताइन् । ‘लुगा धोऔं भनेपनि नसुक्ने भएर बरु मैलो लुगा लगाइन्छ,’ उनले भने । चिसोले गर्दा बालबालिका तथा वृद्धवृद्धालाई बढी समस्या हुने गरेको उनको भनाइ छ ।

‘जाडोले गर्दा काम गर्न समेत सकिरहेका छैनौँ,’ धनगढी १ का अट्टोरिक्सा चालक मोहनराज कठरियाले भने, ‘जाडोले अटो चलाउन नसकेपछि दिनभरि आगो तापेर बस्छौँ । अटो नचलाउँ भनेपनि बैंकको किस्तासमेत कसरी तिर्ने भन्ने चिन्ता छ ।’ गत वर्ष उपमहानगरपालिकाले दाउरा र न्यानो कपडा दिएपनि यस वर्ष नदिएकोमा उनले दुखेसो पोखे ।
धनगढी उपमहानगरपालिका वडा नम्बर १ का वडाध्यक्ष एवम् प्रवक्ता सन्तोष मुडभरिले विगतका वर्षहरुमा दाउरा लगायत न्यानो कपडा वितरण गरिएको भएपनि यस वर्ष वन सम्बन्धी मुद्दालगायतका कारण दाउरा सकंलन हुन नसकेको र वितरण गर्न नसकिएको बताए ।

‘धेरै नै चिसो बढ्न थाल्यो भने त्यसको हामीहरु केही न केही विकल्प वैकल्पिक उपायहरु केही गर्छौँ’ उनले भने, ‘विभिन्न वडाहरुमा बजेट अलग तरिकाले पठाइएको हुन्छ । जुन–जुन वडामा योजना राखेका छौँ त्यहाँ वितरण भइरहेको छ ।’