काठमाडौँ । सरकारले खरिद प्रक्रियाबाट आगामी सोमबार र मंगलबार थप ४० लाख डोज मोडर्ना खोप ल्याउने भएको छ । यसअघि ल्याइएका मोडर्ना खोप १२ देखि १७ वर्ष उमेरका बालबालिकालाई दिइएको छ ।

यो खोप पनि सोही उमेर समूहका खोप लगाउन बाँकी बालबालिकालाई दिइने स्वास्थ्य मन्त्रालयले तयारी गरेको छ । स्वास्थ्य सेवा विभाग आपूर्ति व्यवस्थापन शाखाका प्रमुख सुरेन्द्र चौरसियाले आगामी सोमबार र मंगलबार ४० लाख खोप आउने जानकारी दिए । उनले भने, ‘फाइजर खोप हामीले ५ देखि ११ वर्ष उमेर समूहका बालबालिकालाई दिने योजना बनाएका छौँ, अब १२ देखि १७ वर्ष उमेर समूहका बालबालिकालाई मोडर्ना नै दिने नीति हो ।’

यसअघि फाइजर खोप पनि १२ देखि १७ वर्ष उमेर समूहका बालबालिकालाई दिइएको थियो । तर, अब सो खोप ५ देखि ११ वर्ष उमेर समूहका बालबालिकालाई दिने योजना अघि सारिएको छ । नेपालमा कोभिडविरुद्ध भेरोसेल, कोभिसिल्ड, एस्टाजेनेका, जानसन, फाइजर, मोडर्ना लगायतका खोपहरु लगाइएको छ ।

अहिले फ्रन्टलाइनरहरुलाई अतिरिक्त डोज (तेस्रो डोज) समेत दिन थालिएको छ ।