काठमाडौं । कोरोना भाइरसको नयाँ भेरियन्ट तीव्र गतिमा फैलिएपछि सरकारले देशभरको होटललाई क्वारेन्टिनस्थलका रुपमा परिणत गर्ने भएको छ ।

होटललाई क्वारेन्टिन बनाउने भएपछि संस्कृति, पर्यटन तथा नागरिक उड्डयन मन्त्रालयले होटलको शुल्क प्रस्ताव गरेको छ । उक्त शुल्क होटल एसोसिययन नेपाल (हान)लाई पठाइएको छ ।

प्रस्तावित शुल्कअनुसार सिंगल बेडको २ हजार ५०० र डबल बेडको ४ हजार रुपैयाँ निर्धारण गरिएको छ ।

सरकारले एकपक्षीय रूपमा शुल्क निर्धारण गरेकाे भन्दै हानले आपत्ति जनाएको छ । हानकी अध्यक्ष सिर्जना राणाले तारे होटलमा उक्त शुल्कबाट सञ्चालन खर्च पनि नधान्ने भएकाले स्वीकार गर्न नसकिने बताइन् ।

सरकारले विदेशबाट आउने यात्रुलाई १० दिन होटल क्वारेन्टाइनमा राख्ने व्यवस्था गरेको छ । गतवर्ष पनि सरकारले होटल क्वारेन्टाइनको व्यवस्था गरेको थियो ।