काठमाडौँ । पार्टी विभाजनसँगै निर्वाचन आयोगले नेकपा एमाले र जनता समाजवादी पार्टी (जसपा)का निर्वाचित प्रदेशसभा सदस्य तथा स्थानीय जनप्रतिनिधिलाई दल रोज्न समयसीमा दिएको छ । उनीहरूलाई पहिलेकै पार्टीमा बस्ने वा नयाँ पार्टीमा जाने निर्णय गर्न आगामी भदौ २२ गतेसम्म समय दिएको हो ।

सरकारले संघीय संसद वा केन्द्रीय समितिको २० प्रतिशत पुर्याएर दल विभाजन गर्न सक्ने अध्यादेश जारी गरेसँगै नेकपा एमालेका नेता माधव कुमार नेपालले नयाँ पार्टी नेकपा एकीकृत समाजवादी गठन गरेका थिए । यस्तै, जसपाबाट असन्तुष्ट भएका नेता महन्थ ठाकुर पक्षले लोकतान्त्रिक समाजवादी पार्टी बनाएका थिए । आयोगले गत ९ गते सनाखत गराएसँगै दुवै पार्टीले मान्यता पाएका थिए ।

अध्यादेशमा प्रदेश र स्थानीयमा निर्वाचित भएका जनप्रतिनिधिलाई २१ दिनभित्र दल रोज्न दिने व्यवस्था गरिएको छ । सोही व्यवस्थाअनुरुस आयोगले आइतबार बैठक बसी आगामी २२ गतेसम्म दल रोज्न दिने निर्णय गरेको हो ।

आयोगको निर्णयसँगै नेकपा एमाले र जसपाबाट निर्वाचित भएका प्रदेशसभा सदस्य र स्थानीय जनप्रतिनिधिले २२ गतेसम्म सनाखत गरिसक्नु पर्ने छ ।