काठमाडौँ । नेपालको चिया र अलैंची निर्यात घटेको छ । देशको निर्यात व्यापारमा प्रमुख हिस्सा ओगट्ने गरेका चिया र अलैंचीको निर्यात घटेको छ ।

चालू आर्थिक वर्षको पहिलो महिना साउनमा चिया र अलैंचीको निर्यात घटेको हो । अघिल्लो आर्थिक वर्षको सोही अवधिको तुलनामा औसत ४१.१ प्रतिशतले घटेको भन्सार र व्यापार तथा निकासी प्रवद्र्धन केन्द्रले जनाएको छ ।

भन्सार विभागको तत्थ्यांक अनुसार गत महिना ३३ करोड रुपैयाँ बरारबको ११ लाख ३३ हजार २ सय ८० किलो चिया निकासी भएको छ । जुन अघिल्लो आर्थिक वर्षको सोही अवधिको तुलनामा ५७.९ प्रतिशतले कमी हो ।

गत आर्थिक वर्षको साउनमा ७८ करोड ६३ लाख रुपैयाँ बराबरको २८ लाख २९ हजार ७ सय ४७ किलो चिया निकासी भएको हो ।

यसैगरी गत महिनामा अलैंचीको निर्यात पनि २५.१ प्रतिशतले घटेको छ । उक्त अवधिमा ३५ करोड ६५ लाख ७८ हजार रुपैयाँ बराबरको ४ लाख ५३ हजार किलो अलैंची निकासी भएको छ । अघिल्लो आर्थिक वर्षको सोही अवधिमा ४७ करोड ६२ लाख रुपैयाँ बराबरको ५ लाख ९५ हजार अलैंची निर्यात भएको भन्सार विभागले जनाएको छ ।