काठमाडौँ । कोरोना भाइरस (कोभिड–१९) महामारीबाट प्रभावित पर्यटन क्षेत्रसँग सम्बन्धित श्रमिकहरूले शान्तिपूर्ण आन्दोलन थालेका छन् । स्वतन्त्र पर्यटन श्रमिकहरूको छाता संगठन नेपाल स्वतन्त्र पर्यटन श्रमिक संघ (निटोग)ले सोमबारदेखि नेपाल पर्यटन बोर्डमा शान्तिपूर्ण आन्दोलन सुरु गरेको हो ।

लामो समय बितिसक्दा पनि सम्बन्धित निकायबाट कुनै सहयोग नभएपछि उनीहरू आन्दोलनमा उत्रिएका हुन् । आफ्नो दैनिक जीविकोपार्जनमा परेको समस्या लिएर सरकार, टुरिजम बोर्डलगायत सम्बन्धित निकायमा ध्यानाकर्षण गराईसकेको निटोगले जनाएको छ । तर, कुनै पक्षबाट समस्या सुनुवाई नभएपछि बाध्य भएर आन्दोलनमा उत्रिएको उनीहरूले बताएका छन् ।

यस्तै, पूर्ण मात्राको खोप लगाई पिसिआर नेगेटिभ रिपोर्ट लिएर नेपाल आएका पर्यटकलाई समेत क्वारेनटाइन बस्नु पर्ने नियमले पर्यटकहरू नेपाल आउन निरुत्साहित भएको निटोगको ठहर छ । यसले दक्ष पर्यटन श्रमिकहरूमा अनिश्चित भविष्यको चिन्ता र निराशा बढाएको निटोगका अध्यक्ष रामकाजी प्रयासले बताए । आन्दोलनमा श्रमिकले विभिन्न खाले माग झल्कने नारा लगाएका थिए ।

नेपाल पर्यटन बोर्डले सीमित व्यक्तिको पहुँचमा पुग्ने गरी पर्यटन श्रमिक कल्याणकारी कोष परिचालन गर्ने बाटो लिएको र अनेकन मुद्दामा बहुसंख्यक श्रमिकको भावना कुल्चेको निटोगको आरोप छ ।