जनकपुर । नेकपा (माओवादी केन्द्र) का अध्यक्ष पुष्पकमल दाहाल प्रचण्डले दुई दिनभित्रै गठबन्धन सरकारले पूर्णता पाउने बताएका छन् ।

पार्टीको प्रदेश २ स्तरीय प्रशिक्षण कार्यक्रममा सहभागी हुन शनिबार जनकपुर आइपुगेका प्रचण्डले प्रशिक्षणपछि पत्रकारहरुसँग कुरा गर्दै असोज ४ गतेभित्रै सरकारले पूर्णता पाउने दाबी गरे ।

‘प्राविधिक कारण’ले मन्त्रिपरिषद् विस्तारमा ढिलाइ भएको उनको भनाइ थियो ।

एमसीसीमा विवाद छैन

नेकपा माओवादी केन्द्रका अध्यक्ष प्रचण्डले अमेरिकी सहयोग परियोजना एमसीसीमा सत्ता गठबन्धनमा कुनै विवाद नरहेको पनि बताए ।

एमसीसीबारेमा विवाद भई गठबन्धन टुट्न लागेको भनी भ्रम फैलाउने काम भएको भन्दै उनले गठबन्धनमा कुनैपनि प्रकारको असन्तुष्टि नरहेको दाबी गरे । गठबन्धनमा असन्तुष्टी रहेको भनी प्रतिगामी शक्तिले भ्रम फैलाएको उनको भनाइ थियो ।

संविधान र राष्ट्रको रक्षाका लागि गठबन्धन बनेको भन्दै प्रचण्डले गठबन्धन नटुट्ने दाबी गरे । उनले पहिलेको एमसीसी प्रस्तावमा रहेका विषयहरु तोडमोड भएकै कारण यसलाई बिना परिमार्जन संसद्बाट पारित गर्न नमिल्ने स्पष्ट गरे ।

उनले अमेरिकी संसद्मा एमसीसी इण्डो प्यासिफिक स्ट्राटेजीको अंग हो भन्ने विषय चर्चामा आएपछि नेपालमा विवाद झन चर्किएको बताए । तर प्रचण्डले एमसीसीलाई इण्डो प्यासिफिक स्ट्राटेजीको अंग हो होइन भन्नेबारेमा भने केही कुरा बोलेनन् ।