काठमाडौं । नेपाल नागरिक उड्डयन प्राधिकरणमा नयाँ महानिर्देशकका लागि प्रतिष्पर्धा देखिएको छ ।

हालका महानिर्देशक राजन पोखरेलले अनिवार्य अवकाश पाउने भएपछि चार जना महानिर्देशकको प्रतिस्पर्धामा देखिएका छन् । जसमा ३ जना १२औँ तहका छन् भने एक जना ११औँ तहका हुन् । १२ औँ तहमा ६ जना रहेकोमा देवानन्द उपाध्याय र नरेन्द्र बहादुर थापाले भर्खरै अवकाश लिइसकेका छन् ।

अब राजकुमार क्षेत्री, भोला गुरागाईं र प्रतापबाबु तिवारी नयाँ महानिर्देशक बन्ने दौडमा परेका छन् ।

राजकुमार क्षेत्री कर्पोरेट निर्देशनालयको जिम्मेवारीमा छन् भने भोला गुरागाईं हवाइ सुरक्षा निर्देशनालयमा छन् । प्रतापबाबु तिवारी त्रिभुवन विमानस्थलका महाप्रबन्धक छन् ।

प्राधिकरणको आठौँ तहबाट सिधै ११औँ तहमा प्रतिस्पर्धाबाट पुगेका इन्जिनियर प्रदीप अधिकारीले समेत महानिर्देशकको दाबी गरेका छन् ।

महानिर्देशकको नियुक्ति मन्त्रिपरिषदले गर्छ । हाल उड्डयन मन्त्रालय प्रधानमन्त्रीले नै हेर्दै आएकाले केही आकांक्षी प्रधानमन्त्री निकट व्यक्तिहरुसँग महानिर्देशकको लागि मोलमोलाई गरिरहेका विभिन्न सामाजिक सञ्जालमा आइरहेका छन् ।

नेपाल नागरिक उड्डयन प्राधिकरणमा एउटा युरोपियन युनियनको कालोसूचीबाट नेपाललाई हटाउने नेतृत्व गर्ने आवश्यकता छ । अर्कोे प्राधिकरणका कर्मचारी केही समययता विरोधमा रहेकाले उनीहरुलाई विश्वासमा लिनुपर्ने रहेको नेपाल नागरिक उड्डयन प्राधिकरणका प्रवक्ता राजकुमार क्षेत्रीले जानकारी दिए ।