काठमाडौं । नेपाल कम्युनिष्ट पार्टी (एकीकृत समाजवादी) का उपाध्यक्ष राजेन्द्र पाण्डेले एमालेमा ब्यक्ति पूजा मात्र रहेको बताएका छन् । पार्टीभित्र वैचारिक राजनीतिक वहस नहुने र त्यहाँ ओलीबाद मात्र रहेको भन्दै उनले ओलीको ब्यक्ति पूजामात्र एमालेमा रहेको बताएका हुन् ।

हालै एमालेले सम्पन्न गरेको विधान महाधिवेशनमा ओलीको महिमामण्डन गर्न गरिएको तयारी र त्यसभित्र ओलीको विरोधीलाई बोल्न, समुह नेता बन्न रोकेका कारण पनि एमालेमा वैचारिक वहस नै अव सकिएको पाण्डेले बताएका हुन् ।

एमाले विचलनबादी र राष्ट्रिय आत्मसमर्पणवादी धारको अगुवा गर्ने पार्टी भएको र आफनो पार्टी नेकपा एकीकृत समाजवादी पार्टी भने सशक्त कम्युनिष्ट धारको नेतृत्व गर्ने पार्टी भएको पनि पाण्डेले बताए ।

काठमाडौँ महानगरपालिका–१५ स्वयम्भू वडा कमिटीले दसैं तिहारलगायत विभिन्न पर्वका अवसरमा आज यहाँ आयोजना गरेको कार्यक्रममा पाण्डेले लोकतान्त्रिक मूल्य मान्यताका आधारमा सामूहिक निर्णय नेकपा एकीकृत समाजवादी पार्टीमा हुने जिकिर गरे ।

पार्टीका सचिव जीवनराम श्रेष्ठले एमालेमा एकल नेतृत्व हाबी भएकाले आफूहरुले अन्तरसङ्घर्ष गरी त्यसलाई सच्याउन खोजेको भए पनि नेतृत्व तयार नभएपछि पार्टीमा विद्रोह गरी नयाँ कम्युनिष्ट पार्टी स्थापना गरिएको जानकारी दिए । उनले कम्युनिष्ट विचारलाई एकीकृत समाजवादीले मात्र अवलम्बन गरेको दावी गरे ।

काठमाडौँ महानगरपालिकाका प्रवक्ता ईश्वरमान डङ्गोलले संसद् पटकपटक विघटन भएकाले संसद् विकास कोषबाट वडामा आउने सहयोगमा असर पुगेको बताउँदै यसले जनहितमा कार्य गर्न नसकिएको तथा स्थानीय विकासमा समस्या आएको बताएका थिए ।