कैलाली । कैलालीका चार स्थानीय तहमा नेपाली कांग्रेसको पालिका अधिवेशन मंगलबारका लागि स्थगित भएको छ । धनगढी उपमहानगरसहित कैलालीका चार स्थानीय तहमा नेत्र विक्रम चन्द विप्लव नेतृत्वको नेकपा समूहले गरेको एक दिने नेपाल बन्द र मतदाता नामावली प्रिन्टमा ढिलाई हुँदा अधिवेशन स्थगित भएको जनाइएको छ ।

नेपाली कांग्रेस कैलाली जिल्लाका पार्टी सभापति नरनारायण शाह ’मनु’ले धनगढी उपमहानगर, गौरीगंगा, घोडाघोडी र भजनी नगरपालिकाको अधिवेशन स्थगित भएको जनाएका छन् । शाहले भने, “बन्दका कारण सबै उम्मेदवार र मतदाता उपस्थित हुन नसक्ने अवस्था देखियो । त्यसैले स्थगित गर्नु पर्यो ।”

यस्तै, गोदावरी, चुरे, मोहन्याल, कैलारी, जोशीपुर, बर्दगोरिया, लम्की, जानकी र टीकापुर पालिकाहरूमा भने अधिवेशन भइरहेको छ । उनका अनुसार चार नगरमा भोलि बिहान ८ बजेदेखि मात्रै नगर अधिवेशन हुने छ ।

कांग्रेसको पालिका अधिवेशनपछि मंसिर ३ गते प्रदेश निर्वाचन क्षेत्रको अधिवेशन हुने छ । मंसिर ६ गते संघीय निर्वाचन क्षेत्र अधिवेशन सम्पन्न भएपछि मंसिर १० गते जिल्ला अधिवेशनका लागि मिति तोकिएको छ । कैलाली कांग्रेसले वर्तमान सभापतिको अध्यक्षतामा एक हजार ५ सय १ सदस्यीय जिल्ला अधिवेशन मूल व्यवस्थापन समिति गठन गरेको जनाएको छ ।