काठमाडौँ । कानुन व्यवसायीहरूलाई धम्की दिने दुई जनालाई प्रहरीले पक्राउ गरेको छ । बिहीबार नेपाल बार एसोसिएसन परिसरभित्र पसेर कानुन व्यवसायीलाई धम्की दिने सिताराम श्रेष्ठ र तीर्थ ढकाल पक्राउ परेका हुन् ।

महानगरीय प्रहरी परिसर काठमाडौँको टोलीले बिहीबार राति नै उनीहरूलाई बौद्धबाट पक्राउ गरेको हो । उनीहरूले कानुन व्यवयसायीलाई अपशब्द बोल्दै दुर्व्यवहार गरी गाली गरेका थिए ।

उनीहरुले वकिललाई आन्दोलन नगर्न, गलत मुद्दा नउठान र जथाभावी नबोल्न धम्की दिएका थिए । उनीहरूले आन्दोलन गरिरहे बारभित्रै कुट्ने बताएका थिए । कानुन व्यवसायीलाई धम्की दिएपछि उपस्थित वकिलहरुले प्रतिकार गरेका थिए । लगत्तै उनीहरू बार परिसर बाहिर निस्केर भागेका थिए ।

उनीहरूमाथि अनुसन्धान भइरहेको प्रहरीले जनाएको छ । दुवै जना टेकुस्थित परिसरको हिरासतमा छन् । बाँकी दुई जना भने फरार रहेको प्रहरीले जनाएको छ ।