काठमाडौं । नेपाली कांग्रेसको शुक्रबारदेखि शुरु हुने १४ औं महाधिवेशनमा प्रचारप्रसारमा अंकुश लगाइएको छ । पटक पटकको निर्वाचनको प्रचारप्रसारमा मात्रै मोटो रकम खोला बगाउने गरेको भन्दै कांग्रेसले आलोचना खेप्दै आएको छ ।

यसपालीको पार्टी महाधिवेशनमा यस्तै हुन सक्ने भएकाले निर्वाचन समितिले आचारसंहिता बनाएको छ ।

केन्द्रीय निर्वाचन समितिका संयोजक गोपालप्रसाद घिमिरेले महाधिवेशन प्रतिनिधिहरुका लागि आचारसंहिता सार्वजनिक गरेका छन् ।

कांग्रेस केन्द्रीय निर्वाचन समितिको आचारसंहिताअनुसार प्रचार सामग्रीका रुपमा भिजिटिङ कार्ड मात्रै प्रयोग गर्न पाइने भएको छ ।

यस्तै, सानेपास्थित कांग्रेस केन्द्रीय कार्याल्य, भृकुटी मण्डप परिसर र महाधिवेशनस्थल आसपास ५ सय मिटर क्षेत्रभित्र निर्वाचसँग सम्बन्धित कुनै पनि प्रचार सामग्री राख्न निषेध गरिएको छ । त्यस ठाउँमा ब्यानर, भित्तेलेखन, पोष्टर, तुल, पम्पलेट, इत्यादी टाँस्न तथा माइकिङ गर्न समेत निर्वाचन समितिले मनाही गरेको छ ।