काठमाडौं । सहिद स्मारक ‘ए’ डिभिजन लिगअन्तर्गत शनिबार भएको खेलमा पराजित भएसँगै च्यासल युथ क्लव ‘बी’ डिभिजनमा घटुवा भएको छ ।

आजको पहिलो खेलमा च्यासल युथ फ्रेन्ड्स क्लबसँग २–१ पराजित हुँदै रेलिगेशनमा परेको हो ।

रेलिगेशन जोन भन्दा एक स्थान माथि रहेको फ्रेन्ड्सले च्यासललाई पराजित गरे ‘ए’ डिभिजन क्लवमा सुरक्षित गरेको छ ।

आजको खेलमा ३८औँ मिनेटमा कप्तान नथाजियल जर्ज गार्सियाको हेडरलाई टच दिँदै जमोल एन्थोनी फ्रान्कोइसले गोल गर्दै फ्रेन्ड्सलाई अग्रता दिलाएका थिए ।

४१औँ मिनेटमा च्यासलका अभिषेक लिम्बूले जमोल एन्थोनीलाई पेनाल्टी बक्सभित्र लडाएपछि फ्रेन्ड्सले पेनाल्टी पाएको थियो । खेलको ४३औँ मिनेटमा जमोल एन्थोनीको पेनाल्टी गोलमा परिणत भएपछि फ्रेन्ड्सको दोहोरो अग्रता बनायो ।

खेलको ५६औँ मिनेटमा मोउसा अवगानाले पेनाल्टीमा सान्त्वना गोल गरे । खेलको ५४औँ मिनेटमा फ्रेन्ड्सका गोलरक्षक राहुल रामचन्द्र यादवले च्यासलका फरवार्ड राजिव लोप्चनलाई पेनाल्टी बक्स भित्र फल गरेपछि च्यासलले पेनाल्टी पाएको हो ।

यसअघि खेलमा दुबै टोलीले केही अवसर बनाए पनि सदुपयोग गर्न सकेनन् । खेलको पाँचौं मिनेटमा फ्रेन्ड्सका निशेन सुब्बाको सटलाई प्रदिप भण्डारीको हातमा पुगेको हो ।

त्यस्तै च्यासलका मोउसा अवगानाको सट बार माथिबाट बाहिरिएको थियो ।

हारसँगै यस सिजनका लागि च्यासल रेलिगेसनमा पर्ने पहिलो टोली बनेको छ । च्यासलले १२ खेलबाट ६ अंक मात्र जोडेको छ । फ्रेण्ड्सले यस जितसँगै १० अंक जोड्दै १२औँ स्थानमा छ ।

२०७३ सालमा ‘बी’ डिभिजन जितेर पहिलो पटक ‘ए’ डिभिजनमा उक्लेको च्यासलले २०७५ र २०७६ मा ‘ए’ डिभिजन खेलेको थियो ।