काठमाडौं । युक्रेनको दक्षिणी सहर माइकोलिएभमा सेनाको ब्यारेकमा क्षेप्यास्त्र प्रहारबाट धेरै जनाको ज्यान गएको छ । एक रिपोर्टका अनुसार यस आक्रमणबाट कम्तिमा ४५ जनाको मारिएका छन् ।

युक्रेनको सहर ओडेसामा रहेका बिबिसी संवाददाता एन्ड्रयू हार्डिंगका अनुसार सहरको उत्तरी इलाकामा रहेको सेनाको ब्यारेकमा दुई वटा क्षेप्यास्त्र खसेका थिए । त्यहाँ अहिले उद्धार र राहत कार्य भइरहेको छ ।

यी ब्यारेकमा स्थानीय सैनिकलाई प्रशिक्षण दिइन्थ्यो । यी सैनिकहरु ब्ल्याक सिको किनाराबाट रुसी सेनाले गरिरहेको आक्रमणको प्रतिरोध गरिरहेका थिए ।

रुसले युक्रेनमाथि आक्रमण सुरु गरेको २४ दिन भएको छ । अहिलेसम्म त्यहाँ ८ सय १६ जना सर्वसाधारण मारिएको संयुक्त राष्ट्र संघले जनाएको छ ।

संघका अनुसार मार्च १७ सम्म १ हजार ३ सय ३३ जना आम नागरिक घाइते भएका छन् । संयुक्त राष्ट्रसंघीय मानवअधिकार कार्यालय (ओएचसीएचआर) का अनुसार भीषण बमबारीमा सबैभन्दा बढी मानिस मारिएका छन् ।