काठमाडौँ । आईपीएलमा गयराति भएको खेलमा सनराइजर्स हैदरावाद दिल्ली क्यापिटल्ससँग ७ रनले पराजित भएको छ ।

पहिला ब्याटिङ गरेको दिल्ली क्यापिटल्सले २० ओभरमा ९ विकेट गुमाएर १४४ रन बनाएको थियो । जवाफमा सनराइजर्स हैदरावादले पूरा ओभर खेलेर ६ विकेट गुमाउँदै १३७ रन मात्रै बनाउन सक्यो ।

टस जितेर पहिले ब्याटिङ गरेको दिल्लीका लागि कप्तान डेभिड वार्नरले २१, मिचेल मार्सले १५ बलमा ५ चौकाको मद्दतले २५, मनिष पाण्डेले ३४ र अक्षर पटेलले ३४ रन बनाए ।

अरु ब्याट्सम्यानले दोहोरो अंकमा रन बनाउन सकेनन् । सनराइजर्स हैदरावादका वासिङ्टन सुन्दरले तीन तथा भुवनेश्वर कुमारले दुई विकेट लिए ।

लक्ष्य पछ्याएको सनराइजर्स हैदरावादले बलियो सुरुवात गरे पनि जित निकाल्न सकेन । मयंक अग्रवाल ४९, ह्यारी ब्रुक ७, राहुल त्रिपाठीले १५, अभिषेक शर्मा ५, कप्तान एडेन मार्करामले ३, हेनरिक क्लासेनले ३१ रन बनाए पनि जित निकाल्न सकेनन् ।

दिल्ली क्यापिटल्सका लागि एनरिक नोर्टजे र अक्षर पटेलले २–२ विकेट लिए ।