काठमाडौं । प्रधानमन्त्री पुष्पकमल दाहाल प्रचण्डले मधेसमा बजेट कम परेको भनी सांसदहरुले संसदमा उठाएको प्रश्नमा सत्यता नरहेको बताएका छन् । प्रधानमन्त्री प्रचण्डले संघीयताको अर्थ बुझिदिन प्रधानमन्त्रीले सांसदहरुसाग आग्रह गरेका थिए ।

संसदमा शुक्रवार प्रधानमन्त्रीसँगको प्रश्नोत्तरमा कांग्रेसका सांसद अजय चौरसियाले उठाएको प्रश्नको जवाफ दिने क्रममा त्यस्तो बताएका हुन् । ‘मधेशमा कम बजेट विनियोजन भयो भन्ने साँचो होइन, संघीयताको मर्मबमोजिम संघबाट प्रदेश र स्थानीय तहमा हुने वित्तीय हस्तान्तरणको १५ प्रतिशतभन्दा बढी रकम मधेशमै जाने गरेको छ । त्यसका अतिरिक्त संघीय सरकारले पूर्व–पश्चिम राजमार्ग, पथलैया–वीरगञ्ज कोरिडोर, हुलाकी राजमार्ग, बागमती–कमला–चन्द्र नहरलगायत ठूला विकास आयोजनाहरू काम गर्दै आएको छ,’ प्रधानमन्त्री प्रचण्डले भने, ‘आयोजनाहरूको कार्यप्रगति र आवश्यकताका आधारमा बजेट विनियोजन हुने भएकाले त्यहीअनुसार बजेट विनियोजन हुँदै आएको छ ।’

प्रधानमन्त्रीले संघीयताको मर्मअनुरुप वित्तीय हस्तान्तरणमा १५ प्रतिशतभन्दा बढी रकम सोझै मधेशलाई दिइएको बताए । संघीय सरकारकै मातहतमा मधेश प्रदेशमा थुप्रै विकास आयोजनाहरू सञ्चालन भइरहेको प्रधानमन्त्रीको भनाई थियो ।

प्रधानमन्त्रीले मधेशमा अरू पनि थुप्रै आयोजनामा बजेटको प्रबन्ध गरेको बताए । उनले पर्साको वीरगञ्ज सहरको विकास सरकारको प्राथमिकतामा रहेको र नारायणी अस्पताल, ठाकुरराज बहुमुखी क्याम्पस लगायत त्यहाँको पुर्वाधार विकासमा समेत सरकारले बजेटको प्रबन्ध गरेको बताए ।