काठमाडौं । सुनकाण्डको छानबिनको माग गर्दै प्रमुख प्रतिपक्षी दल नेकपा एमालेले गत साउन १० देखि अवरुद्ध गर्दै आएको प्रतिनिधि सभा बुधबारबाट सञ्चालन भएको छ । बैठक अहिले जारी छ । छानबिनका लागि आयोग गठन गर्ने दलहरुबीच सहमति भएपछि बैठक सञ्चालन भइरहेको हो । एमालेले छानबिन आयोग बनाउने माग गरेर सदन अवरोध गर्दै आएको थियो ।

प्रतिनिधिसभाको बैठक सुरु भएलगत्तै उपप्रधान तथा रक्षामन्त्री पूर्णबहादुर खड्काले प्रतिनिधि सभालाई सुनकाण्ड छानबिनका लागि उच्चस्तरीय आयोग बनाउने दलीय सहमतिको जानकारी गराएका छन् ।

सिंहदबारमा प्रधानमन्त्री पुष्पकमल दाहालद्वारा आह्वान गरिएको राष्ट्रिय मान्यताप्राप्त दलहरूबीच दुई बुँदे सहमतिसँगै सदन खुलेको हो । इलेक्ट्रिक सिक्रेटमा लुकाएर ल्याएको सुन साथै ब्रेक सुमा हालेर तस्करी गरिएको सुनलगायतका घटनामा उच्चस्तरीय जाँचबुझ आयोग बनाउने सहमति भएको हो ।

दलहरूबीच एक महिनापछि असोज ५ गते आयोग गठन गर्ने सहमति भएको कांग्रेस प्रमुख सचेतक रमेश लेखकले बताए । उनका अनुसार सुन तस्करीका सबै घटनाको छानबिन गर्न उच्चस्तरीय जाँचबुझ आयोग गठन गर्ने सहमति बनेको छ । एमालेले साउन १० गतेबाट संसद अवरोध गर्दै आएको थियो ।