काठमाडौं । प्रधानमन्त्री पुष्पकमल दाहालले संघीय निजामती सेवा विधेयकलाई केही दिनभित्रै संसदमा पेश गर्ने बताएका छन् ।

सोमबार राष्ट्रियसभा बैठकमा सांसदहरुले उठाएको प्रश्नको जवाफ दिँदै प्रधानमन्त्री दाहालले भोलि (मंगलबार) बस्ने मन्त्रिपरिषद बैठकले विधेयक पारित गरी संसदमा पेश गर्ने सम्भावना रहेको बताए । मन्त्रिपरिषद् बैठक मंगलबार नियमित बस्छ ।

‘सम्भवतः भोलिको मन्त्रिपरिषदको बैठकबाट पारित गरेर सदन समक्ष प्रस्तुत गर्ने तयारी रहेको जानकारी गराउन चाहन्छु,’ प्रधानमन्त्री दाहालले भने । उनले संघीय निजामती सेवा विधेयक ल्याउन ढिला भएको स्वीकार गरे ।

अघिल्लो प्रतिनिधि सभाको राज्य व्यवस्था समितिबाट पारित भएको विधेयकलाई सरकारले परिमार्जन गरेर अन्तिम रुप दिएको पनि प्रधानमन्त्री दाहालले जानकारी दिए ।