काठमाडौं । राष्ट्रिय तथ्यांक कार्यलयले कृषि गणनाको नतिजा सार्वजनिक गरेको छ। हरेक १० वर्षमा हुने गणनाको नतिजा बिहीबार राष्ट्रिय तथ्यांक कार्यालयले सार्वजनिक गरेको हो ।

सार्वजनिक तथ्यांक अनुसार, नेपालमा कृषि गर्ने जमिन घटेको छ । तर कृषि गर्ने जनसंख्या भने बढेको तथ्यांकमा उल्लेख छ । नयाँ तथ्यांकअनुसार कृषि गर्ने परिवार संख्या भने ३ लाख परिवारले वृद्धि भएको छ । नया तथ्यांकअनुसार देशभर ४१ लाख ३१ हजार परिवार कृषिमा आबद्ध छन् ।

कृषि गणना २०७८ को सार्वजनिक तथ्यांक अनुसार ३९ लाख ९९ हजार खेतीपाती आवद्ध भएको उल्लेख छ । त्यस्तै १ लाख ३२ हजार ले पशुपंक्षी मात्र पाल्ने गरेको पाइएको हो।

२०६८ को विवरण अनुसार ३७ लाख १६ हजार परिवार खेतीपातिमा र १ लाख १६ हजार पशुपंक्षी पालनमा थिए। नेपालमा २२ लाख १८ हजार हेक्टर जमिनमा कृषि गरिएको छ । जुन २०६८ सालको तुलनामा ३ लाख ८ हजार हेक्टरले कम हो ।