काठमाडौं । घरेलु मैदानमा जारी अन्तर्राष्ट्रिय महिला च्याम्पियनसिपमा नेपाली महिला फुटबल टिम लगातार दोस्रो जित निकाल्दै फाइनलमा प्रवेश गरेको छ ।

बिहीबार त्रिपुरेश्वरस्थित दशरथ रंगशालामा सम्पन्न खेलमा नेपालले लेबनानविरुद्ध १–० को जित निकाल्दै फाइनल यात्रा तय गरेको हो । नेपालको जितमा सावित्रा भण्डारीको प्रहारले जाली चुमेको थियो । खेलको ४२औँ मिनेटमा १८ यार्ड बक्सबाहिरबाट सावित्राले गरेको प्रहार लेबनानका खेलाडीबाट डिफ्लेक्ट हुँदै गोल भएको थियो ।

जितसँगै नेपालले दुई खेलबाट ६ अंक जोड्दा दोस्रो स्थानमा रहँदै फाइनलमा स्थान बनाएको हो । नेपालले अब लिग चरणको अन्तिम खेलमा आइतबार म्यानमारविरुद्ध प्रतिस्पर्धा गर्नेछ ।

नेपालसँगै फाइनल प्रवेश गरिसकेको म्यानमारले एक–अर्काविरुद्ध उपाधिका निम्ति खेल्ने तय भइसकेको छ । यसअघि म्यानमारले आजै भएको पहिलो खेलमा कीर्गिस्तानविरुद्ध ५–० को जित निकाल्दै फाइनल यात्रा तय गरेको थियो ।