काठमाडौँ । समाज सेवी भद्राकुमारी घलेको पहलमा स्थापना भएको ‘भद्र घले शिक्षा सदन’को १६ औँ वार्षिकोत्सव मनाएको छ । आर्थिक रुपमा विपन्न तथा अशक्त बालबालिकालाई गुणस्तरीय शिक्षा प्रदान गर्ने उद्देश्यले घलेले उक्त विद्यालय स्थापना गरेकी थिइन् ।

शिक्षा क्षेत्रमा महत्वपूर्ण काम गरेकी घलेलाई विद्यालय व्यवस्थापन समिति सम्मान पनि गरेको छ । घलेको ९१ औँ जन्म दिनको अवसरमा विद्यालयले एक कार्यक्रम आयोजना गरी बिहीबार सम्मान गरेको हो । साथै, विद्यालय परिसरमै घलेको ९१ औँ जन्म दिन पनि मनाइएको विद्यालय समितिले जानकारी दिएको छ ।

अनामगर र घट्टेकुलो क्षेत्रमा रहेका विपन्न परिवारका बालबालिकालाई सुलभ शुल्कमा गुणस्तरीय शिक्षा प्रदान गर्ने घलेको उद्देश्य रहेको थियो । त्यही उद्देश्यबाट प्रेरित भई खोलिएको उक्त विद्यालयले अहिले गुणस्तरीय शिक्षा प्रदान गरिरहेको विद्यालय व्यवस्थापनको भनाई छ ।