काठमाडाैं। दयाहाङ राई र प्रकृति श्रेष्ठको मुख्य भूमिका रहेको फिल्म ‘बिहे पास’ बैशाख १ गते रिलिज हुने पक्का भएको छ। निर्माण टिमले सरस्वती पूजाको शुभ दिन पारेर बिहीवार फस्टलुक पोष्टर सार्वजनिक गर्दै प्रदर्शन मिति घोषणा गरेको हो ।

रोहित कट्टेल प्रस्तुतकर्ता रहेको यो चलचित्रलाई प्रवेश पौडेलले निर्देशन गरेका हुन्। रोजन श्रेष्ठ निर्माता, रत्न श्रेष्ठ कार्यकारी निर्माता रहेको चलचित्रको सह निर्मातामा ग्याल्जेन लामा र बालकृष्ण प्राखीन रहेका छन् ।

चलचित्रमा शिशिर वाङदेल, बुद्धि तामाङ र रबिन्द्र झा लगायतको समेत अभिनय छ ।

बिहेपासको प्रदर्शन मिति तय भएसँगै अब दयाहाङका दुईवटा फिल्म एकैदिन रिलिज हुने भएका छन्। सोही मितिमा दयाहाङ र मिरुना मगरको फिल्म ‘जारी’ को रिलिज हुँदैछ।

साथै ‘भगवत् गीता’, ‘नाई नभन्नु ल ६’, ‘प्रसाद २’ पनि रिलिज बैशाख १ गते नै रिलिज हुने लाइनमा छन्। यी सबै चलचित्रबीच रोचक भिडन्त हुने देखिएको छ ।