काठमाडाैं । वलिउड अभिनेता शाहरुख खानले रोल्स रोयस कार किनेका छन् । आफु अभिनित फिल्म ‘पठान’काे सफलतापछि अभिनेता खानले आफैलाई याे महँगो उपहार दिएका हुन् ।

उनले किनेकाे रोल्स रोयस कारको मूल्य करिब १० करोड भारू रहेको बताइएको छ । आइतबार साँझ उनको मन्नत भित्र ‘५५५’ नम्बर प्लेट भएको सेतो लग्जरी कार प्रवेश गरेको देखिएकाे थियाे ।

रिपोर्टका अनुसार यो कारको एक्स शो रुम मूल्य ८.२० करोड रहेको छ । कम्पनीले कारमा थप विकल्प दिने भएकाले यसको कुल लागत करिब १० करोड पुगेको बताइएकाे छ । यो एक सीमित एडिसनको कार हो जुन प्रि-अर्डर गरेपछि मात्रै डेलिभरी हुन्छ।

शाहरुखले यसअघि पनि आफुलाई उपहार दिँदै आएका छन् । उनले गत महिना ५ करोडको घडी लगाएका थिए, जसले सबैको ध्यान तानेको थियो।