काठमाडौं । प्रधानमन्त्री कप एकदिवसीय राष्ट्रिय प्रतियोगितामा बागमती प्रदेशले कोशी प्रदेशलाई २७४ रनको बलियो लक्ष्य दिएको छ ।

त्रिवि क्रिकेट मैदानमा टस हारेर पहिला ब्याटिङको निम्तो पाएको बागमती ४८।३ ओभरमा २७३ रन बनाएर अल आउट भयो ।

बागमतीका लागि ओपनर आशुतोष घिरैयाले शतकीय पारी खेले । उनले १ सय ११ बलमा १६ चौका र २ छक्कासहित ११८ रन बनाए । अर्का ओपनर ईशान पाण्डे भने ६ रन बनाउँदै पेभेलियन फर्किएका थिए ।

यस्तै कप्तान रित गौतमले ४९ रन जोडे । रविन जोशीले पनि ४३ रनको योगदान दिए।

प्रतिक श्रेष्ठले पनि टोलीको खातामा १९ रन बनाए भने अन्य ब्याटस्म्यानले दोहोरो अंकमा रन बनाउन सकेनन् ।

कोशीका अभ्यास तिमिशिनाले ९ ओभरमा ४३ रन खर्चेर ३ विकेट लिए । कमल खत्रीले ९.३ ओभरमा ५१ रन खर्चेर १ विकेट लिए । हेमन्त राईले १० ओभरमा ५४ रन खर्चेर २ विकेट लिए । फिर्दोस अन्सारीले १ विकेट लिए ।