काठमाडौं । बलिउडका चर्चित कोरियाग्राफर एवं निर्देशक रेमो डिसूजा, उनकी श्रीमती लिजेल डिसूजा समेत ७ जनामाथि एउटा नृत्य समूहले धोकाधडीको उजुरी दर्ता गरेका छन्।

भारतीय सञ्चारमाध्यम दैनिक जागरणका अनुसार महाराष्ट्रको ठाणे जिल्लामा उनीहरू विरूद्ध उजुरी दर्ता भएको हो। उनीहरूमाथि ११ करोड ९६ लाख भारू ठगेको आरोप छ।

मिडिया रिपोर्टका अनुसार यो मुद्दा २६ वर्षीया डान्सरको उजुरीमा दर्ता गरिएको हो।

उजुरीका अनुसार डान्सर र उसको ग्रुपसँग सन् २०१८ देखि सन् २०२४ को बीचमा धोकाधडी भएको हो। यस ग्रुपले टिभीको एउटा शोमा प्रदर्शन गरेर जीत पनि हासिल गरेको थियो। रेमो र उनको समूहले पीडितहरूको समूह आफ्नो हो भन्ने देखाएर शोमा जितेको ११ करोड ९६ लाख भारूको पुरस्कार राशि हत्याएको आरोप लगाइएको छ।