काठमाडौँ । कर फछर्यौट आयोग २०७१ का पदाधिकारीहरूले करिब एक अर्ब ३३ लाख रुपैयाँ घुस लिएको खुलेको छ । अख्तियार दुरुपयोग अनुसन्धान आयोगका अनुसार उनीहरूले एक अर्ब ३३ लाख २० हजार ३८५ रुपैयाँ घुस रकम लिएका हुन् ।

आयोगका अनुसार तत्कालीन अध्यक्ष लुम्बध्वज महत, सदस्यद्वय उमेशप्रसाद ढकाल र चुडामणि शर्मा ढकाल (तत्कालीन महानिर्देशक, आन्तरिक राजश्व विभाग)ले २०७१–१०–२२ मा नेपाल राजपत्रमा प्रकाशित सूचित आदेश र कर फर्छ्यौट आयोग ऐन, २०३३ ले दिएको अधिकारबाहिर गएर वदनियतपूर्वक करदातासँग उक्त रकम दिएका हुन् । उनीहरूले नेपाल सरकारलाई प्राप्त हुने ठूलो राजस्व भ्रष्टाचार गरेको आयोगमा उजुरी परेको थियो ।

उनीहरूले तत्कालीन कर फर्छ्यौट आयोगका पदाधिकारी रहेका प्रतिवादीहरूले कर फर्छ्यौट आयोग ऐन, २०३३ को दफा १७ बमोजिम असल नियतले आफ्नो कार्य सम्पादन नगरेको पुष्टि भएको छ । उनीहरूविरुद्ध भ्रष्टाचार निवारण ऐन, २०५९ को दफा ७ र दफा ७ को देहाय (क)मा परिभाषित कसुर गरेको पुष्टि भएकाले उक्त रकम बराबरको माग दाबी गरिएको छ ।

उनीहरूविरुद्ध आज बुधबार विशेष अदालत काठमाडौँमा मुद्दा दायर भएको आयोगका प्रवक्ता नारायण प्रसाद रिसालले जानकारी दिए ।