काठमाडौँ । राउटे युवतीमाथि यौनहिंसा गरेको अभियोगमा पक्राउ परेका तीन जनालाई जिल्ला अदालत सुर्खेतले पुर्पक्षका लागि कारागार चलान गरिएको छ । न्यायाधीश दिलप्रसाद सापकोटाको इजलासले उनीहरूलाई पुर्पक्षका लागि थुनामा राख्न आदेश दिएको हो ।

गत जेठ २३ गते पक्राउ परेका गुर्भाकोट नगरपालिका ९ बोटेचौरका चोमन घर्ती भनिने चौमनबहादुर घर्ती, मिलन भनिने मनबहादुर पुन र भूपेन्द्र बुढा मगरलाई कारागार चलान गरिएको हो ।

जेठ २१ गते मिलनले सञ्चालन गरेको बोटेचौरको शुभकामना होटलमा राउटे युवतीमाथि यौन हिंसा भएको थियो । फिरन्ते जीवन बिताउँदै आएको राउटे समुदाय यसअघि सुर्खेत र दैलेखका विभिन्न स्थानमा बस्दै आएका थिए ।

यो घटना हुँदा उनीहरू गुर्भाकोट नगरपालिका ११ आँपसोतीस्थित भेरी नदीको किनारामा बस्दै आएका थिए ।