काठमाडौं । सरकारले बाढी तथा पहिरोबाट प्रभावित सिन्धुपाल्चोक र मनाङ जिल्लालाई विपद् संकटग्रस्त जिल्ला घोषित गरेको छ ।

आज सिंहदरबारमा बसेको मन्त्रिपरिषद् बैठकले विपद् जोखिम न्यूनीकरण तथा व्यवस्थापन ऐन, २०७४ बमोजिम सिन्धुपाल्चोक र मनाङ जिल्लालाई आगामी असोज मसान्तसम्म लागू हुने गरी विपद् संकटग्रस्त जिल्ला घोषणा गर्ने निर्णय गरेको कानून, न्याय तथा संसदीय मामिला मन्त्री ज्ञानेन्द्रबहादुर कार्कीले जानकारी दिए ।

गत असार महिनामा आएको बाढी तथा पहिरोबाट सिन्धुपाल्चोक र मनाङ नराम्ररी प्रभावित भएको थियो ।

बैठकले नेपाललाई कोरोनाविरुद्धको खोप र अत्यावश्यक स्वास्थ्य सामग्री उपलब्ध गराउने छिमेकीलगायत सबै मित्र राष्ट्रलाई हार्दिक धन्यवाद दिने निर्णय गरेको छ । बैठकले अनुदानमा थप खोप उपलब्ध गराउन खोप उत्पादक एवं मित्र राष्ट्रलाई आह्वानसमेत गरेको छ ।

यस्तै बैठकले इस्लाम धर्मावम्बीको ठूलो पर्व बकर इदको अवसरमा यही साउन ६ गते सार्वजनिक बिदा दिने निर्णय गरेको छ ।