काठमाडौँ । भारतीय प्रहरीको कारबाहीमा भारतको महाराष्ट्रमा कम्तीमा पनि २६ जना नक्सलाइट विद्रोही मारिएका जनाइएको छ । महाराष्ट्रको गदचिरोली जिल्लामा भारतीय सुरक्षाकर्मीसँग नक्सलाइटको भिडन्त भएको थियो ।

भिडन्तमा परी कम्तीमा २६ जना नक्सलाइटहरूको ज्यान गएको बताइएको छ । प्रहरीका अनुसार यस क्रममा केही प्रहरी घाइते भएका बताइएको छ ।

महाराष्ट्र प्रहरीका अनुसार उक्त जिल्लाको मार्दिनतोला जंगलमा सो भिडन्त भएको थियो । भिडन्तमा मारिएका २६ नक्सालको शव प्रहरीले फेला पारेको जनाएको छ । कतिपय विद्रोहीहरू भागेका र केही घाइते भएका छन् ।

उक्त जंगलमा प्रहरीले केही अघिदेखि खोजी अभियान सञ्चालन गरिरहेको छ । त्यस क्रममा केही हप्ताअघि प्रहरी र नक्सालहरुबीच भिडन्त भएको थियो ।

जंगलमा प्रहरी टोली पुगेपछि नक्सालहरूले आक्रमण सुरु गरेका बताइएको छ । प्रहरीले ती नक्सालहरूले प्रयोग गरेका हतियारसमेत बरामद गरेको जनाएको छ ।

यी नक्सालहरू भारतको मध्य तथा पूर्वी क्षेत्रमा पछिल्ला समयमा सक्रिय रहेका थिए । ती क्षेत्रमा सुरक्षा व्यवस्था कडा पारिएको भारत सरकारले जनाएको छ ।