काठमाडौं । संसदमा सबैभन्दा ठूलो दल रहेको नेकपा एमालेमा आन्तरिक लोकतन्त्र कमजोर भएको भन्दै केपी ओलीसँग अध्यक्ष पदमा चुनाव लडेका तत्कालिन उपाध्यक्ष भीम रावल अब के गर्लान भन्ने कौतुहलता सिर्जना भएको छ । चितवन महाधिवेशनमा केन्द्रीय सदस्यको समेत सपथ नलिएका रावलले आफू अध्यक्षको उम्मेदवार भएको केन्द्रीय सदस्यको उम्मेदवार नभएको जिकिर गदै बाहिरिएका थिए ।

नवनिर्वाचित पदाधिकारी र केन्द्रीय सदस्यहरुको सपथ ग्रहण अवधिभर मञ्चमा रहेका रावलले केन्द्रीय सदस्यको सपथ लिएनन । रावललाई केन्द्रीय सदस्यमा भोट मागिएको थियो तर रावल आफैले केन्द्रीय सदस्यमा उम्मेदवारी नदिएको बताउदै आएका थिए । उनले निर्वाचन आयोगलाई पनि अध्यक्षको मात्रै उम्मेदवार भएको जानकारी गराएका थिए । चितवनबाट फर्केका रावल केही दिन चुपचाप बसेका थिए ।

ओलीसँग भारी मतले पराजित भएका रावलले केही दिन चुप बसेर आइतबार संसद बैठकबारे धारणा सार्वजनिक गरेका छन् ।
तर आइतबार एमाले नेता रावलले संसद् बैठक अवरुद्ध गर्न नहुने बताएका छन् । आइतबार साँझ ट्विट गर्दै रावलले सरकारका सबै कामकारबाही हुन दिई संसद् अवरूद्ध गरेको भन्नुको औचित्य नहुने बताए ।

यसअघि अध्यक्षको पदबहाली गर्दै केपी ओलीले माधव नेपाललगायत पार्टीले कारबाही गरेका एमालेका तत्कालीन सांसद उपस्थित हुने संसद् बैठक चल्न नदिने बताएका थिए । रावलले संसद् देश र जनताको पक्षमा बहस गर्ने, आवाज उठाउने थलो भएको स्मरणसमेत गराए । ‘संसद् देश र जनताको पक्षमा बहस गर्ने र आवाज उठाउने थलो हो । सरकारका सबै कामकारबाही हुन दिई संसद् अवरूद्ध गरेको भन्नुको औचित्य छैन । कि सरकारले ल्याउने विधेयक र प्रस्ताव रोक्न सक्नुप¥यो । नभए त्यसबारे जनताको आवाज उठाउन पाउनुप¥यो । अन्यथा म कुटेजस्तो गर्छु तँ रोएजस्तो गर् भनेझैँ ठहर्छ,’ उनले सामाजिक सञ्जालमा भनेका थिए ।

ओलीले मध्यवधि निर्वाचनको रटान दिइरहेका बेला रावलले संसद अवरुद्धको औचित्य नभएको बताएका हुन् । एमालेभित्र उनको भूमिका अझै स्पष्ट भएको छैन । नवौ महाधिवेशनपछिको विधानमा अध्यक्षको निर्वाचनमा हार्नेलाई वरिष्ठ नेताको पद दिने भएपनि संशोधित विधानमा भने त्यो व्यवस्था छैन ।

मंसिर २५ र २६ गते हुने केन्द्रीय कमिटी बैठकले १० प्रतिशत केन्द्रीय सदस्य मनोनयन गर्ने भएपनि रावललाई केन्द्रीय सदस्यमा मनोनयन गर्ने र स्थायी कमिटीमा लैजाने कि नजाने भन्ने विषयमा पार्टी अध्यक्ष ओलीले कसैले केही बताएका छैनन । रावललाई केन्द्रीय सदस्यमा मनोनयन गर्न दबाब परिरहेको भएपनि ओलीले केही बताएका छैनन ।

‘राववलाई केन्द्रीय सदस्यमा मनोनयन गरेर स्थायी कमिटी सदस्य बनाउनुपर्छ भन्ने दबाब छ तर यो विषयमा अध्यक्ष केपी शर्मा ओलीले केही बताएका छैनन’,एमालेका एक नेताले भने । तर रावल निकट नेताहरुले तत्कालै रावलले कुनै धारणा सार्वजनिक गरिनसकेको बताएका छन् ।

‘उहाँ अहिले छलफलमै हुनुहुन्छ, पार्टीभित्रको लोकतान्त्रिक पद्धतिलाई जीवित राख्ने उहाँको चाहाना हो यसमा अन्यथा मान्नुपर्ने कुनै विषय छैन’, रावल निकट एक नेताले भने । उनले अहिलेसम्म के गर्ने भन्ने बारेमा कसैलाई केही बताएका छैनन । आफू निकटका नेताहरुसँग छलफलमै रहेको बताएको भएपनि के गर्ने भन्ने बारेमा केही नबताएको ती नेताले दावी गरे ।