बुटबल । नेकपा (माओवादी केन्द्र)का नेता कुलप्रसाद केसी लुम्बिनी प्रदेशकाे मुख्यमन्त्रीमा नियुक्त भएका छन् । प्रदेश प्रमुख अमिक शेरचनले उनलाई मुख्यमन्त्रीमा नियुक्त गरेका हुन् ।

केसीले आजै प्रदेश प्रमुखसमक्ष ४२ सांसदको हस्ताक्षर बुझाउँदै मुख्यमन्त्री दावी गरेका थिए ।

लुम्बिनी प्रदेशका कुल ८० सांसदमध्ये ४२ जना सांसदले उनलाई मुख्यमन्त्रीका लागि साथ दिएका थिए ।

कांग्रेस, माओवादी केन्द्र, राष्ट्रिय जनमोर्चा र जनता समाजवादीको गठबन्धनबाट उनी मुख्यमन्त्री बन्न पुगेका हुन् ।

केसीलाई हृदयेश त्रिपाठी समूहमा रहेका एमालेको सूर्यचिन्हबाट चुनाव जितेका सांसद अजय शाही समेतले हस्ताक्षर गरेका छन् । एमालेसँग त्यहाँ ३८ सांसद थिए । शाहीले पनि कांग्रेस माओवादीतिर हस्ताक्षर गरेपछि शंकर पोखरेलसँग मात्रै ३७ सांसद सिमित हुन पुगेको छ ।

एमाले नेता शंकर पोखरेलले वुधबार मुख्यमन्त्री पदबाट राजीनामा दिएका थिए । अहिले मुख्यमन्त्री नियुक्त भएका केसी यस अगाडी पोखरेल नेतृत्वकै प्रदेश सरकारमा आन्तरिक मामलिा तथा कानुन मन्त्रीको जिम्मेवारीमा समेत थिए ।

कांग्रेस र माओवादीले यो प्रदेशमा संसदको बाँकी अवधी बराबरी समय सरकारको नेतृत्व गर्ने सझदारीपछि शुरुमा केसी मुख्यमन्त्री बनेका हुन् ।