काठमाडौं । पाँच विद्यार्थी संगठनले मध्यपश्चिमाञ्चल विश्वविद्यालयका उपकुलपति नन्दबहादुर सिंहलाई बर्खास्त गर्न माग गरेका छन् । बिहीबार बागबजारस्थित अखिल क्रान्त्रीकारीको कार्यालयमा बसेको नेविसं, अनेरास्ववियु, समाजबादी विद्यार्थी युनियन र अखिल छैठौंको वैठकले मध्यपश्चिमाञ्चल विश्वविद्यालयका उपकुलपतिको बर्खास्तीको माग गरेका हुन् ।

पाँच सद्यार्थी संगठनले बैठकपछि विज्ञप्ति सार्वजनिक गर्दै, मध्यमाञ्चल विश्वविद्यालयको समस्या समाधान सम्बन्धमा प्रधानमन्त्री एवं कुलपति शेरबहादुर देउवालाई भेटी मागपत्र बुझाएको र हालसम्म समस्या समाधान नगरिएको जनाएका छन् । उपकुलपतिद्वारा प्रशासनको दुरुपयोग र गुण्डागर्दी गरी विद्यार्थीमाथि सांघातिक हमला गरी घाईते बनाइएको र समस्या समाधानका लागि पहल नगर्ने तथा उत्ताउलो तरिकाले प्रस्तुत भैरहेको भन्दै बर्खास्त गर्न माग गरेका हुन् ।

बर्खास्तीपछि खुला प्रतिस्पर्धाको आधारमा उपकुलपति नियुक्ति गर्नुपर्ने अडान व्यक्त गर्दै नियुक्तिमा राजनीति दलको भागबन्डा गरिएमा त्यो झनै प्रत्युत्पादक हुने विद्यार्थी आन्दोलनलाई मान्य नहुने चेतावनी समेत दिएका छन् ।

बिहीबार नेपाल विद्यार्थी संघको केन्द्रीय अध्यक्ष राजिब ढुंगाना, अखिल क्रान्तीकारीका अध्यक्ष रञ्जित तामाङ, अनेरास्ववियुका अध्यक्ष सुदेश पराजुली, समाजबादी विद्यार्थी युनियनका अध्यक्ष रुपनारायण श्रेष्ठ र अखिल छैठौंका अध्यक्ष विमल पोखरेलको संयुक्त वैठकले मध्यपश्चिमाञ्चल विश्वविद्यालयका उपकुलपतिको बर्खास्ती मागसहित अन्य सात विषयबारे निर्णय गरेको छ ।