काठमाडौँ । नेकपा एमालेका अध्यक्ष केपी शर्मा ओली आज चितवन जाने भएका छन् । पार्टीको १० औँ महाधिवेशन स्थलको निरीक्षण र आवश्यक जानकारी लिन उनी चितवन जाने भएका हुन् ।

अध्यक्ष ओलीले महाधिवेशन उद्घाटन सत्र हुने नारायणी नदी किनार र बन्द सत्र हुने सौराहाका सम्भावित ठाउँको निरीक्षण गर्ने कार्यक्रम रहेको छ । उद्घाटन सत्रको टुंगो लागे पनि बन्द सत्र होटल वा खुल्ला ठाउँ कहाँ गर्ने भन्ने विषयमा टुंगो लागेको छैन ।

ओलीले आज महाधिवेशनको ठाउँ निरीक्षण गरेसँगै टुंगो लाग्ने एमालेका जिल्ला अध्यक्ष पार्वती रावलले जानकारी दिइन् । महाधिवेशनमा दुई हजार हाराहारी प्रतिनिधि हुने छन् ।

काठमाडौँबाट स्थलमार्ग हुँदै चितवन जाने भएका ओलीले उद्घाटन स्थलको स्थलगत अवलोकन गर्ने कार्यक्रम रहेको छ । सो पश्चात् एमाले भरतपुर महानगर कमिटीको प्रथम अधिवेशन उद्घाटन गरेर उनी महाधिवेशनको बन्द सत्र हुने सौराहा जाने कार्यक्रम रहेको छ ।

दुई दिनको चितवनको बसाईमा ओली माडीको अयोध्याधाम र नारायणी नदीमा क्रुजको अवलोकन गर्ने कार्यक्रम छ । ओलीलाई बाटोका विभिन्न स्थानमा एमालेका नेता कार्यकर्ताले स्वागतका कार्यक्रम राखेका छन् ।

बुटवलमा हुने भनिएको महाधिवेशन अन्तिम चरणमा चितवन सारिएको हो । महाधिवेशन आगामी मंसिर १०, ११ र १२ गते हुने भएको छ ।