काठमाडौँ । सत्तारुढ नेकपा माओवादी केन्द्रले यथास्थितिमा मिलेनियम च्यालेञ्ज कर्पोरेसन (एमसीसी) पास नगर्ने निर्णय गरेको छ । मंगलबार बसेको स्थायी समिति बैठकमा नेताहरूले अर्थ मन्त्रालय, प्रधानमन्त्री शेरबहादुर देउवा र पार्टी अध्यक्ष पुष्पकमल दाहाल प्रचण्डले एमसीसीलाई लेखेको पत्रमाथि प्रश्न गरेका थिए ।

एक साताको विदेश भ्रमणबाट फर्किएलगत्तै प्रधानमन्त्री देउवाले एमसीसी पास गर्न आफू र प्रचण्डले पत्र पठाएको बताएका थिए । प्रधानमन्त्रीको उक्त भनाईसँगै पुनः चर्चामा आएको एमसीसीबारे माओवादी केन्द्रका नेताहरुले मंगलबारको बैठकमा प्रश्न गरेका थिए । बैठकमा नारायणकाजी श्रेष्ठ, देव गुरुङ, लीलामणि पोखरेललगायत नेताहरूले पत्र पठाउनु गल्ती भएको बताउँदै प्रचण्डमाथि प्रश्न गरेका थिए ।

बैठकपछि माओवादी केन्द्रका प्रवक्ता कृष्णबहादुर महराले राष्ट्रिय सहमति र सम्झौतामा संशोधन तथा परिमार्जन नभई एमसीसी पास नहुने बताएका थिए ।

‘हाम्रो पार्टीमा केही कुरा राष्ट्रिय सहमति कायम नभई र केही संशोधन, परिमार्जन नभई अगाडि नबढाउने भन्ने भएको छ,’ प्रवक्ता महराले भने, ‘एमसीसीको कतिपय कुराहरु आपत्तिजनक छन्, त्यसमा परिमार्जन नभई अगाडि बढाउन सकिदैन् ।’