काठमाडौँ । जापानका प्रधानमन्त्री फुमियो किशिदालाई कोरोना भाइरसको सङ्क्रमण पुष्टि भएको छ । सङ्क्रमण पुष्टि भएपछि उनी एकान्तवासमा बसेका छन् ।

मन्त्रीपरिषद्का मुख्य सचिव हिरोकाजु मात्सुनोले ६५ वर्षीय प्रधानमन्त्री किशिदालाई स्वास्थ्यमा भने कुनै समस्या नरहेको जानकारी दिए ।

उनलाई भेट्न आएका व्यक्तिबाट उनमा सङ्क्रमण सरेको आशंका गरिएको छ । सङ्क्रमण पुष्टि भएपछि उनका लागि तय गरिएका दर्जनौ कार्यक्रमहरु स्थगित गरिएका छन् ।

कतिपय कार्यक्रम भने भर्चुअल माध्यमबाट गर्ने तयारी भएको पनि उनको सचिवालयले जनाएको छ । उनी आगामी अगष्ट ३० सम्म एकान्तवासमा बसेका छन् । उनले कोरोना भाइरसविरुद्धको चौथोपटकको खोप पनि लगाइसकेका छन् ।

जापानमा पछिल्लो समय कोरोना भाइरसको सङ्क्रमण फेरि अत्यधिक फैलिएको छ । दैनिक लाखौँ सङ्क्रमित हुने गरेका छन् । सरकारले कारोना भाइरसविरुद्धको खोप लगाउने अभियानलाई तिव्रताका साथअगाडि बढाइरहेको छ ।

त्यसैगरी, कोरोना भाइरसको सङ्क्रमण न्युनीकरणका लागि अपनाउनु पर्ने उपाय कडाइका साथ लागू गर्न पनि सरकारले अनुरोध गर्दै आएको छ ।