म कानमा लाउने सुनको दलाल
म तिहुनमा लाउने नुनको दलाल
म मकैमा लाग्ने घुनको दलाल
म भेडाको जीउको उनको दलाल
म देशले लाउने गुनको दलाल
म सुरक्षामा नपर्ने सुको दलाल

म प्रजातन्त्रमा नलाग्ने कूको दलाल
म ढलमा बग्ने नर्कको दलाल
म आकाशमा फल्ने फलको दलाल
म नदेखिने खालको दलको दलाल
म किसानले लाने बीउको दलाल
म बिदेशमा बिक्ने जीउको दलाल
म सडकमा लाग्ने गिट्टीको दलाल
म कोठीमा बेच्ने ठिटीको दलाल

म डाँकाको बीचको प्रीतिको दलाल
म सेवाग्राहीले लिने सेवाको दलाल
म परिश्रमीले लिने मेवाको दलाल
म बाकसमा आउने लाशको दलाल
म ठिनेमिने होईन खासविशेषको दलाल
म भूकम्प पीडितको पालको दलाल
म बाढी पीडितको दालको दलाल
म बिचौलियाको जालको दलाल
म गुण्डाले लिने कालको दलाल

म पण्डाले लिने भेटीको दलाल
म नापी र माल दुवैको दलाल
म विकास र निकास सबैको दलाल
म घरबार दरबार दुवैको दलाल
म मन्दिरमा बज्ने घण्टीको दलाल
म बाह्रमासे आण्टीको दलाल
म तिनपाने भट्टीको दलाल
म पहेंलो बोक्ने टट्टीको दलाल
म मेरी आमा मट्टीको दलाल
म सारै निच घट्टीको दलाल

म ज्यान मार्ने दलालको दलाल
म फरार हुने परारको दलाल
म भाडामा मिल्ने करारको दलाल
म ब्रुश्ली जस्तो प्रहारको दलाल
म मुस्ली जस्तो दारको दलाल
म एक्सरे नदेख्ने अन्धाको दलाल
म सुन बोक्ने बन्दाको दलाल
म अत्ति कालो धन्दाको दलाल
म इमान्दार मास्ने मज्जाको दलाल
म बेइमानी पाल्ने गज्जबको दलाल

म घुस र भुस द्वयको दलाल
म मानिस मार्ने भयको दलाल
म हालसाल विदेश गएको दलाल
गर्छन कि कसो जनताले हलाल

(कवि सञ्जेल गत मंगलबार मात्रै सरकारी स्थायी कर्मचारीबाट ४० वर्ष ४ महिना ६ दिन सेवा गरी बिदा भएका छन् ।)