काठमाडौँ । चिनियाँ विदेश मन्त्रीसँग नेपालका परराष्ट्रमन्त्रीले टेलिफोन वार्ता गरेका छन् । परराष्ट्रमन्त्री नारायण खड्का र चिनियाँ समकक्षी विदेशमन्त्री वाङ यीबीच टेलिफोन वार्ता भएको हो ।

दुई नेताबीच झण्डै २० मिनेट लामो टेलिफोन वार्ता भएको हो । परराष्ट्र मन्त्रालयकी प्रवक्ता सेवा लम्सालले दुई समकक्षीका बीचमा टेलिफोन वार्ता भएको जानकारी दिइन् । ‘उहाँहरुबीच टेलिफोन वार्ता भएको हो,’ परराष्ट्र मन्त्रालयकी प्रवक्ता लम्सालले भनिन् ।

दुई नेताबीचमा दुई देशका सरकारको सम्बन्ध, कोभिड खोपका विषय लगायतमा कुराकानी भएको हो । चीनले कोभिड नियन्त्रणका लागि गरेको सहयोगका विषयमा परराष्टमन्त्री खड्काले आभार व्यक्त गरे ।

टेलिफोन वार्तामा विदेशमन्त्री वाङले थप २० लाख डोज खोप नेपाललाई अनुदान दिने जानकारी मन्त्री खडकालाई गराएको परराष्ट मन्त्रालयले जनाएको छ ।

नेपालका लागि चिनियाँ राजदुत होउ यान्छीले चिनियाँ विदेशमन्त्री वाङ यी र परराष्ट्रमन्त्री खड्काबीच भएको टेलिफोन बार्ता फलदायी भएको बताएकी छिन् ।

उनले दुई विदेश मन्त्रीबीचको कुराकानीमा वाङले अतिरिक्त २० लाख डोज खोप अनुदानमा चीनले नेपाललाई उपलब्ध गराउने घोषणा गरेको ट्वीटमार्फत जानकारी गराएकी छिन् ।