काठमाडौँ । अख्तियार दुरूपयोग अनुसन्धान आयोगले एसआरडी कन्स्ट्रक्सनका सञ्चालक रमेश पराजुली र सन्दिप केसीमाथि ७५ लाख ८० हजार बिगो दाबी गरी कारबाही माग गरेको छ ।

नवलपरासी (पश्चिम) सुनवल नगरपालिकाअन्तर्गत पानभार खोलामा आर्थिक वर्ष २०७५-०७६ मा नदीजन्य पदार्थ उत्खनन् तथा निकासीको ठेक्कामा मापदण्ड विपरीत उत्खनन गरेको भन्दै उनीहरूमाथि आयोगले बिगो दाबीसहित कारबाहीको माग गरेको आयोगका प्रवक्ता नारायण प्रसाद रिसालले जानकारी दिए ।

उनीहरूले राजस्व छली गरेको भन्ने उजुरीमा अनुसन्धान हुँदा फर्जी बिल प्रयोग गरी ७५ लाख ८० हजार ६४९ रूपैयाँ हिनामिना गरेको देखिएको हो । उनीहरूमाथि भ्रष्टाचार निवारण ऐन २०५९ को दफा ८ को उपदफा (४) बमोजिमको कारबाही हुने आयोगले जनाएको छ ।