काठमाडौँ । इक्वेडरको एक कारागारमा भएको झडपमा परी मृत्यु हुने कैदीहरूको संख्या कम्तीमा ३० पुगेको छ । बुधबार यहाँका कैदीमध्ये ३० जनाको मृत्यु भएको बताइएको छ ।

यसअघि २४ जनाको मृत्यु भएको र अरु ४२ जना घाइते भएका बताइएको थियो । मंगलबार भएको झडपमा परेर मृत्यु हुनेको संख्या बुधबार ३० पुगेको र घाइतेहरू ५२ जना पुगेको बताइएको छ ।

कारागारमा राखिएका कैदीहरूबीच भएको झडपमा परेर उनीहरु मारिएका हुन् । उनीहरु आफैँबीच भएको झडपका क्रममा धेरै जना घाइते भएका बताइएको छ । घाइतेमध्ये धेरैको अवस्था गम्भीर रहेको प्रहरीले जानकारी दिएको छ । मंगलबार यहाँको समुन्द्री तटीय नगर गाकुइलमा रहेको जेलमा झडप भएको थियो ।

राष्ट्रिय प्रहरीले ती कैदीहरुबीच आपसी झगडाका कारण यस्तो झडप हुन पुगेको बताएको छ । इक्वेडरका कारागारमा समयसमयमा यस्तो झडप हुने गरेको छ ।

गएको फेब्रुअरी महिनामा पनि यहाँका तीन कारागारमा झडप भएको थियो । त्यसमा परेर ७९ जनाको ज्यान गएको बताइएको थियो ।