काठमाडौँ । सोमालियामा खडेरीका कारण खाद्य संकट परेको छ । यहाँका नागरिकहरूले खाद्यान्न अभावको समस्या झेलिरहेको र दिन प्रतिदिन यो समस्या बढ्दै गएको देखिएको छ ।

सोमालियामा रहेको संयुक्त राष्ट्र संघीय मानवीय सहायतासम्बन्धि निकायले खाद्य संकटबारे जानकारी दिएको छ । मानवीयता सम्बन्धी सहयोगका लागि संयुक्त राष्ट्र संघीय कार्यालय (ओसिएचए)ले सोमालियामा आगामी सन् २०२२ को मे महिनासम्म खाद्यान्न अभावको समस्या झन् बढ्ने जनाएको छ ।

समयमा पानी नपरेकाले देशव्यापी सुख्खापन भएको र जसका कारण अहिले १७ लाखभन्दा बढी मानिस खाद्यान्नको अभावबाट प्रभावित भएका बताइएको छ । साथै सो संस्थाले सन् २०२२ को मे महिनासम्म कम्तीमा ३५ लाख मानिसमा खाद्यान्न अभाव देखिने पाइएको जनाएको छ ।

खडेरीले नागरिक प्रभावित भएका हुन् । यसै वर्षको अप्रिलदेखि नै यहाँका मानिसले खाद्य संकट व्यहोरिरहेका छन् । आवश्यक मात्रामा पानी नपरेकाले उब्जनी नहुँदा खाद्यान्न उत्पादन हुन सकेको छैन ।

सोमालियाको सरकारले यही अप्रिलदेखि नै संयुक्त राष्ट्र संघीय अधिकारीसँग परामर्श गरी खडेरीले खाद्य संकट पर्न गएको घोषणा गरिएको थियो । सोही कारण संयुक्त राष्ट्र संघीय मानवीय सहायतासम्बन्धी उक्त निकायले सहयोगका लागि विदेशी दातृ संस्था वा देशलाई आग्रह गरेको छ ।